Deu 16 | NdeIBE | STEP | Gcinani inyanga ka-Abhibhi njalo lenze umkhosi wokuhlonipha iPhasika leNkosi uNkulunkulu wenu, ngoba ngenyanga ka-Abhibhi walikhupha eGibhithe ngobusuku.

Deuteronomy 16

Umkhosi wePhasika

1 Gcinani inyanga ka-Abhibhi njalo lenze umkhosi wokuhlonipha iPhasika leNkosi uNkulunkulu wenu, ngoba ngenyanga ka-Abhibhi walikhupha eGibhithe ngobusuku.

2 Nikelani okwePhasika kuJehova uNkulunkulu wenu ngesifuyo esivela emhlambini wenu loba emhlambini wezimvu endaweni ezakhethwa nguJehova uNkulunkulu wenu ukuba ibe yindawo yebizo lakhe. 3 Lingasidli ndawonye lesinkwa esilemvubelo, kuzakuthi ngensuku eziyisikhombisa lidle esingelamvubelo, isinkwa sokuhlupheka, ngoba lasuka eGibhithe ngokujaha ukuze izinsuku zonke zokuphila kwenu likhumbule isikhathi elasuka ngaso eGibhithe. 4 Akungafunyanwa mvubelo kini lakulo lonke ilizwe lenu okwezinsuku eziyisikhombisa. Njalo lingatshiyi inyama yomhlatshelo wantambama ivuke ilokhu ikhona ngosuku olulandelayo.

5 Linganikeli okwePhasika loba kukuliphi idolobho uJehova uNkulunkulu wenu azalinika lona 6 ngaphandle kwalapho azakhetha khona ukuba kube yindawo yeBizo lakhe. Kulapho elizakwenzela khona umhlatshelo wePhasika ntambama, ekutshoneni kwelanga, kuyisikhumbuzo selanga elasuka ngalo eGibhithe. 7 Yoseni libe seliyidlela endaweni uJehova uNkulunkulu wenu azalikhethela yona. Kuzakuthi ekuseni libuyele emathenteni enu.

8 Okwezinsuku eziyisithupha lizakudla isinkwa esingelamvubelo kuthi ngosuku lwesikhombisa libuthane kuJehova uNkulunkulu wenu lingabambi msebenzi.

IDili loMkhosi wamaViki

9 Balani amaviki ayisikhombisa kusukela mhla laqalisa ukuvuna amabele.

10 Beselisenza iDili loMkhosi wamaViki kuJehova uNkulunkulu wenu ngokupha umnikelo wokuzithandela kusiya ngezibusiso uJehova uNkulunkulu wenu aliphe zona.

11 Ngakho thokozani phambi kukaJehova uNkulunkulu wenu endaweni azayikhethela ukuba ngeyeBizo lakhe – lina lamadodana lamadodakazi enu, izisebenzi zenu zesilisa lezisebenzi zenu zesifazana, abaLevi abasemadolobheni enu, kanye labezizweni, abangelaboyise labafelokazi abahlezi phakathi kwenu. 12 Khumbulani ukuthi laliyizigqili eGibhithe, ngakho landelani leziziqondiso ngonanzelelo.

Umkhosi wamaThabanikeli

13 Yenzani iDili loMkhosi wamaThabanikeli okwezinsuku eziyisikhombisa ngemuva kokubutha amabele enu ezindaweni zokubhulela lezokuhluzela iwayini. 14 Thokozani edilini lenu – lina, amadodana enu kanye lamadodakazi enu, izisebenzi zenu zesilisa lezisebenzi zesifazana, kanye labaLevi, abezizweni, abangelaboyise kanye labafelokazi abahlezi emadolobheni enu. 15 Okwezinsuku eziyisikhombisa yenzani idili kuJehova uNkulunkulu wenu ezindaweni ezakhethwa nguJehova. Ngoba uJehova uNkulunkulu wenu uzalibusisa esivunweni senu sonke kanye lemisebenzini yezandla zenu, ukuze kupheleliswe intokozo yenu.

16 Kathathu ngomnyaka, wonke amadoda kumele aziveze phambi kukaJehova uNkulunkulu wenu endaweni azayikhetha, eDilini loMkhosi weSinkwa esingelaMvubelo, eDilini loMkhosi wamaViki kanye leDilini loMkhosi wamaThabanikeli. Akungabi landoda ezavela phambi kweNkosi ingaphethe lutho:

17 Ngamunye lina lonke kumele lize liphethe isipho kusiya ngokuthi liphiwe labusiswa ngokunganani nguJehova uNkulunkulu wenu.

AbeHluleli

18 Khethani abehluleli lezikhulu ezizwaneni zenu zonke kuwo wonke amadolobho enu elizawaphiwa nguJehova uNkulunkulu wenu, njalo bahlulele abantu ngemfanelo.

19 Lingonakalisi ukulunga loba libandlulule. Lingavumi ukufunjathiswa, ngoba ukufunjathiswa kufiphaza amehlo abahlakaniphileyo kulahlekise amazwi abaqotho.

20 Landelani ukulunga lilandele khona kuphela, yikho lizaphila lilithumbe ilizwe uJehova uNkulunkulu wenu alinika lona.

Ukukhonza abanye onkulunkulu

21 Lingazimiseli o-Ashera bezigodo phansi kwe-alithari elizalakhela uJehova uNkulunkulu wenu, 22 njalo lingamisi ilitshe elizakuthi lina lingcwele, ngoba uJehova uNkulunkulu wenu uyakuzonda lokho.